Fiber-breiband bra for distrikta

Rapporten, som er bestilt av Distriktssenteret, er laga av konsulentselskapet Nexia.

Har undersøkt seks område

Selskapet har kartlagt ny bruk av breiband med høg kapasitet i Austevoll, Bykle, Dyrøy, Fitjar, Forradal og Numedalsregionen.

- Gevinstar etter kort tid

Rapporten slår fast at det er mogleg å ta ut samfunnsgevinstar av breibandsnett med høg kapasitet i distriktsområde, sjølv kort tid etter utbygginga.

- Superbreiband gir gevinst for distrikta og er viktig for å nå måla om å ta heile Norge i bruk, sikre kompetansearbeidsplassar i distrikta og motverke digitale klasseskiljer, skriv Distriktssenteret.

Navarsete: - Raskt breiband ein føresetnad

Kommunal- og regionalminister Liv Signe Navarsete (Sp) meiner rapporten viser nytta av å stimulere til utbygging av breiband i distrikta.

- Rapporten syner at raskt breiband er ein føresetnad for at både private og offentlege verksemder skal bli lokaliserte i distrikta, seier kommunal- og regionalminister Liv Signe Navarsete i ei melding på departementets nettside.

Vilkår for å bu kor ein vil

Sp-leiaren peiker på at raskt breiband også gir fridom til å busetje seg der ein vil når arbeidsplassen er lokalisert ein annan stad.

Samtidig meiner ho at rapporten er eit viktig innspel i når regjeringa skal følgje opp målsetjinga om å leggje til rette for at folk skal kunne bu der dei vil.

- Raskt breiband er å rekne som grunnleggjande infrastruktur i samfunnet, på line med veg, elektrisitet og vatn, seier Navarsete