Finansnæringas vurdering av den økonomisk ryggrada i dei to samvirkeselskapa
gir direkte utslag på botnlinja i rekneskapen. Medan Tine blir vurdert som
eit svært solid selskap, noko som gir låg rente på låna, gir Norturas tronge
økonomi og langt svakare eigenkapital høgare satsar på lånerenta.
Forskjellen er på 1,5 prosentpoeng, noko som utgjer 45 millionar kroner i
ekstrautgifter i året for slakterisamvirket.
– Det har alltid vore dyrt å vere fattig, og slik er det også for Nortura.
Dersom vi får til positiv utvikling over tid, og utvidinga av eigenkapitalen
kjem på plass, så er derimot sjansane for å få betre rentevilkår gode, seier
styreleiar Sveinung Svebestad i Nortura.
Styrkar eigenkapitalen
Årsmøte i Nortura vedtok for ei vekes tid sidan einstemmig å endre vedtektene
for å hente inn rundt 250 millionar kroner i fersk eigenkapital frå
eigarane. Det obligatoriske andelsinnskotet blir auka til 12.000 kroner for
dei godt over 20.000 egg- og kjøttprodusentane i samvirke, og i tillegg
håper konsernleiinga i Nortura at fleire bønder gå inn med ekstra kapital
gjennom frivillige og individuelle ordningar.
Nettopp det at vedtaket var einstemmig trur konsernleiinga i Nortura er viktig
for kredittvurderinga i marknaden.
– Årsmøte dokumenterte at eigarane står klart og tydeleg bak Nortura, og det
er viktig for vurderinga i kredittmarknaden, seier konserndirektør for
økonomi Kai Linnes i Nortura.
Eigarane i Nortura vil i desse dagar få brev med informasjon om endringane.
Kvar enkelt vil dei neste vekene måtte ta stilling til dei ulike alternativa
for innbetaling, og både Svebestad og Linnes understrekar at høg oppslutning
om innbetalinga er like viktig for kredittvurderinga til Nortura som det
einstemmige årsmøtevedtaket.
Siktar oppover
Norturas økonomiske situasjon førte til nedrykk i den såkalla kredittratinga
for eit par år sidan, og i fjor stod samvirkeselskapet i fare for å bli
ytterlegare degradert. Den kraftige resultatforbetringa på slutten av året
og styrka eigenkapitalen hindra derimot det. Ved årsskiftet var Nortura
igjen oppe i 33,5 prosent i eigenkapitalandel, medan målet er å nå 40
prosent innan 2012. Tine hadde til samanlikning 47 prosent eigenkapitalandel
ved årsskiftet.
– Etter fjoråret kan det nok bli krevjande å nå målet alt i 2012. Samtidig er
det opning for å gå ned mot 30-talet att ved planlagd ekspansjon, seier
Linnes.
Ein annan faktor som er viktig for kredittvurderinga er innteninga og
kontantstraumen i selskapet. Her har Nortura som kjent mål om å betre
lønsemda med 2,5 milliardar kroner innan 2012, noko slakterikonsernet skal
vere godt over halvvegs med å gjennomføre. Og dobling av resultatgraden skal
ha like stor positiv effekt på rentevilkåra som å halvere gjelda, ifølgje
utsegn Nortura har fått frå finansnæringa.
Publisert lørdag 08.05.2010 kl. 05:00
Siste innenriks
