Ekspertar skal berge mjølkebøndene

Måndag møttest EUs landbruksministrar i Brussel, medan minst eit par tusen mjølkebønder demonstrerte i gatene.

Kravet frå bondeorganisasjonen European Milk Board (EMB) er at EU gjenopprettar eit kvotesystem for mjølk, etter over eit år med overproduksjon og heilt elendige prisar.

Ministermøtet svara med å peike ut ei så kalla høgnivågruppe som skal sjå nærare på EUs meierimarknad, melder Lantbrukets Affärstidning (ATL).

- Skiftande prisar er den harde røynda på ein globalisert marknad, men mange europeiske mjølkebønder har funne intelligente måtar å sikre seg på, sa EUs landbrukskommisjonær Mariann Fischer Boel i ein tale til landbruksministrane.

Ekspertgruppa skal sjå på korleis forhandlingsposisjonen til mjølkebøndene kan styrkast, blant anna gjennom kontraktane til meieria. Krava frå bondeorganisasjonar og ei mindre gruppe medlemsland om å ruste opp att kvotesystemet, har falle på steingrunn, i følgje ATL.

European Milk Board melder at fem tusen bønder og tusen traktorar deltok i demonstrasjonar under ministermøtet. Politiet i Brussel melder om 2500 demonstrantar.



Publisert tirsdag 06.10.2009 kl. 15:24 (sist endret tirsdag 06.10.2009 kl. 15:24)