–Vi tener ikkje nok pengar og det er nødvendig å endre strukturen i bedrifta, seier informasjonssjef i Nortura, Tine Komissar, til NRK Trøndelag. Ho fortel at ei eiga gruppe er sett til å sjå på kva moglegheiter dei har.
Nortura er leverandør av kjøt og egg, og har 41 fabrikkar på landsbasis. I Trøndelag har dei slakterianlegg både i Namsos, Steinkjer, Heimdal, Tunga, Oppdal og Rissa.
Dersom Nortura bestemmer seg for ny og enklare struktur og heller vil satse på eitt, stort anlegg, må fabrikken plasserast ein stad. Men informasjonssjefen vil førebels ikkje fortelje kvar.
Nortura har spurt fleire kommunar i Trøndelag om kva moglegheiter dei har. Ordførar i Melhus, Erling Bøhle, meiner dei stiller sterkt når dei kan tilby tidlegare Hofstad leir.
–Vi har ei stor og flat tomt som er plassert nær E6. Eg kan ikkje sjå for meg andre som kan stille ei slik byggjeklar tomt til disposisjon så raskt, seier Bøhle.
Nortura vurderer å leggje ned seks av fabrikkane sine i Midt-Noreg, og heller samle all aktivitet i ein ny gigantfabrikk.
09.05.2008 13:10
