Nei-sida ligg på 54-talet for tredje måling på rad.

Les også: Nei-sida til himmels

Sjølv om det er ein liten nedgong sidan førre måling, er tendensen klar.

Det er små svingingar i styrkforholdet mellom nei og ja, viser den siste målinga utført av Sentio Reasearch Noreg for Nationen, Klassekampen og DagenMagazinet.

11 prosent usikre

Av dei 1000 spurde personane svarar knappe 11 prosent at dei ikkje veit kva dei ville stemt i eit EU-val.

Av partia er det berre Høgre og Venstre som har eit ja-fleirtal i sine rekkjer.

58 prosent av Høgreveljarane seier ja, medan det tilsvarande talet i Venstre er 46.

Delt Ap

Nei-sida i Senterpartiet dominerer med sine 95 prosent, medan nei-andelane i KrF og SV ligg godt oppe på 70-talet.

I Ap er det daudt løp, med 44 prosent oppslutnad for begge blokkene.

Les også: Gir Støre ubehag

Av Frp-veljarane ville 61 prosent stemt nei til EU no.

Skeptiske sørlendinger

Det er ingen landsdelar med ja-fleirtal i dag, men i Oslo og Akershus vil like mange stemme ja eller nei til EU, 45 prosent.

Sørlendingane er mest negative til EU.

Der seier 60 prosent at dei ville stemt nei om det var avstemming i no.

Menn mest positive

55 prosent av kvinnene er negative til EU, medan 53 prosent av mennene har same standpunkt.

Målinga viser at 39 prosent av dei spurde mennene er positive til eit EU-medlemskap. Av kvinnene er 32 prosent for det same.

EU-motstanden er sterkast blant dei som ikkje har høgare utdanning.

Men òg dei med universitets- eller høgskuleutdanning har eit fleirtal av nei-folk, med 51 prosent.

- "Ingen" vil debattere

Som fyrste nestleiar i «ja-partiet» Høgre, trur Per-Kristian Foss det skal mykje til før EU-debatten blømer igjen.

- Eg trur det som kan bevege EU-debatten er at eit av partia skifter frå «nei» til «ja» til EU, eller om Island byrjar å bevege seg i retning av å søke EU-medlemskap. Vi vil gjerne debattere EU, men det er vanskeleg å få nokon å debattere med, seier han.

- Er fornøgde

Sidan det går så bra med den norske økonomien som det gjer, trur ikkje Foss forandringsviljen er stor nok til å søke EU-medlemskap.

- Vi er jo i alle praktiske formål medlem av EU, med unntak av landbruk- og fiskerisektorane. Vi bestemmer ingenting, men sit litt passivt og behageleg på sidelinja. Dessutan tener vi sabla mykje pengar på EU, seier han.

Foss meinar å ha sett signal frå Venstre om at dei er i ferd med å skifte standpunkt, og han forundrar seg over den sterke EU-motstanden i SV.

- Stort sett alle SVs systerparti i Europa er for EU. Socialistisk Folkeparti i Danmark opplever jo ein grenselaus suksess i opposisjon, og har lenge vore eit klart «ja»-parti. Men eg trur ikkje SV vil snu i denne perioden, seier Per-Kristian Foss.