Senterpartiet drøfta fredag på sentralstyremøtet om partiet skal ta dissens mot EUs vikarbyrådirektiv.
Partileiar Liv Signe Navarsete svarer via sin rådgjevar, Erlend Fuglum, at Senterpartiet ikkje har nokon kommentar til spørsmålet om dissens så lenge partiet framleis er inne i ein prosess.
Les også: Sp sier nei til vikarbyrådirektivet
Nationen er kjent med at det er usemje om direktivet, både i partiets stortingsgruppe og blant Sp sine regjeringsmedlemer.
Lova å lytte til LO
Fredag vart det klart at SV-leiinga vil ta dissens mot direktivet. Partiet kallar no inn til ekstraordinært landsstyremøte for å ta den endelege avgjerda.
— Eg er ikkje overraska over at Senterpartiet brukar lang tid her. Eg har skjønt heile tida at det var intern usemje om direktivet, seier SVs arbeidspolitiske talskvinne Karin Andersen.
— Mitt håp er likevel at Sp held det dei har lova, seier Andersen.
Ho viser til at Senterpartiets arbeidslivspolitiske talsmann Geir Pollestad i sin appell under fagrørslas store demonstrasjon mot vikarbyrådirektivet 18. januar i år lova at LOs syn ville bli svært viktig for Senterpartiets avgjerd.
Representerer ein million arbeidstakarar
30. januar kravde eit samrøystes LO-sekretariat at regjeringa legg ned veto mot direktivet. Sidan har også arbeidstakarorganisasjonane Unio og YS gått inn for veto.
— Dei som krev veto er organisasjonar som representerer ein million norske arbeidstakarar, seier Andersen.
Les meir om kva Nei til EU meiner i Nationens eavis laurdag 3. mars.
