Felleskjøpet Rogaland Agder (FKRA) fekk heile 169 millionar kroner i minusresultat før skatt på konsernnivå i 2011.
Forverring frå året før
Det viser rekneskapen som det bondeeigde innkjøpssamvirket la fram torsdag.
I 2010 viste konsernrekneskapen 31 millionar kroner i minus før skatt.
Store tap for fôr og erter
Nationen omtalte alt i oktober i fjor at FKRA har tapt over 100 millionar kroner på satsinga på fôr til kjæledyr og omdanning av erter til kraftfôrråvarer.
Det er den direkte årsaka til at det bondeeigde konsernet må bokføre store tap på rekneskapen.
Les: FKRA kuttar 27 årsverk etter store tap på erter og hundemat
Også fleire tidlegare år har satsinga i dotterselskapa tynga økonomien i FKRA.
Drifta frå pluss til minus
Driftsresultatet i konsernet viser 114 millionar kroner i minus, mot 7 millionar i pluss året før.
Nær 2,3 mrd. i salsinntekter
Omsetninga i konsernet auka med 6 prosent til 2297 millionar kroner.
Har sagt opp 30 tilsette
Leiinga i FKRA skriv at tapa i dotterselskapa har belasta rekneskapen med store nedskrivingar.
— Rekneskapen er belasta med store nedskrivingar etter store tap i dotterselskapa AgriMarin og MarinPet. Selskapa er fusjonert og nedskallert til 15 prosent kapasitet. 30 tilsette har mista jobben, skriv FKRA i ei pressemelding.
Kjerneverksemda i pluss
Kjerneverksemda i det bondeeigde samvirke gjekk derimot i pluss.
Morselskapet gjekk 36,5 millionar kroner i pluss på drifta, mot 44,1 millionar året før.
Resultatet før skatt blei på 29 millionar kroner i pluss, ned 1,8 millionar kroner frå året før.
Ny kraftfôr-rekord
FKRA melder om eit historisk høgt sal av kraftfôr. Volumet passerte 342.000 tonn, ein auke på 10.000 tonn.
Marknadsposisjonen skal ha blitt styrka for alle dyreslag.
Sterk oppgang på traktorar
Salet av traktorar auka med over 25 prosent.
Traktormerket John Deere, som Felleskjøpet er forhandlar for, fekk over 30 prosent av marknaden.
Det skal også vere ny rekord, melder FKRA.
Vil selje eigedom for å dekke tap
Trass i store tap forsikrar FKRA at samvirkeføretaket fortsatt er solid.
- FKRA har store verdiar i eigedom. Ein del av desse eigedommane er under utvikling og vil bli realisert i løpet av få år, skriv FKRA i pressemeldinga.
Vidare skriv FKRA at selskapet skal arbeide effektivt vidare med nyskapande produkt og tenester til konkurransedyktige vilkår.
