KrF, Sp, SV og Venstre nær sperregrensa på ny meiningsmåling

Ingen av dei fire småpartia SV, Sp, KrF og Venstre får over 5 prosent oppslutning på februarmålinga Norfakta har utført for Klassekampen og Nationen.

Les også: Trur på sterkare sentrum med Borten Moe

Ikkje sidan desember 2010 har dei fire partia samstundes lege så lågt på målingane.

Ingen uro å spore
Valforskar Anders Todal Jenssen ved NTNU kallar stoda dramatisk, og meiner målinga stadfestar at diskusjonen om sperregrense og taktisk røysting kan verte avgjerande for valet i 2013.

Les også: Borten Moe vil ha KrF i rødgrønn regjering

Det same seier valforskar Toril Aalberg ved same universitet. Hjå dei fire partia sjølv er det derimot inga uro å spore.

KrF-leiar Knut Arild Hareide, Sp-nestleiar Ola Borten Moe, Venstre-nestleiar Ola Elvestuen og leiarkandidat Audun Lysbakken i SV trur alle på at dei skal klare å auke oppslutninga til det komande stortingsvalet.

Les også: KrF utelukker ikke regjeringssamarbeid med Frp

— Eg skjønar at diskusjonen om sperregrensa kjem opp no, men trur det er mildt sagt prematurt å spå at det ser slik ut om 18 månader, seier Borten Moe.

— Vi såg ved valet i 2011 at KrF, Venstre og Sp gjorde det langt betre enn det meiningsmålingane før tilsa. Det er dynamikken i valkampen det, at dei mindre partia kjem meir fram i debattane, seier Hareide.

Trur trenden kan snuast
Todal Jenssen seier ingen av partia har grunn til å kjenne seg tryggje, men at det er SV som bør uroe seg mest for sperregrensa.

— SV har dei har minst lojale veljarar. Partiet har tapt 40 prosent av 2009-veljarane til Ap, seier han.

Det er tal Lysbakken vel å tolke optimistisk.

— Får vi gjort SV-profilen tydelegare, trur eg vi har gode høve for å vinne attende veljarane som har røysta på oss før. Eg har sterk tru på at vi kan greie å snu trenden, og gjere eit betre val i 2013 enn vi gjorde i 2011, seier han.

Både Lysbakken og Borten Moe seier dei ser gode høve for å vinne att fleirtalet for dei raudgrøne. Lysbakken poengterer likevel at han ikkje ser det som realistisk å samarbeide med KrF.

Les hele saka i e-avisa eller i papirutgåva laurdag 11.februar