Studentane ved Institutt for folkekultur ved Høgskolen i Telemark og produktdesignlinja ved Høgskolen i Oslo/Akershus fekk utfordringa i fjor, og 42 av dei svarte på invitasjonen og meldte seg på husflidskonkurransen.
Diamantsting av stoff
No har juryen i konkurransen «Morgendagens helter lager morgendagens kulturarv» sagt sitt, og Aud Julie Befring frå Jølster i Sogn og Fjordane vann førstepremien på 50.000 kroner for puffen Sting med sete laga av overdimensjonerte diamantsting av stoff.
— Dette gir sjølvsagt designarsjølvtillit. Vi sit og ser på produkt kvar einaste dag og lever eigentleg i vår eiga vesle boble. Derfor er det kjekt å få ei stadfesting på det vi gjer, seier Befring til Aftenposten.
Juryen seier om vinnaren at ho har latt seg inspirere av både broderi, strikking og gammal lafteteknikk, brukt på ein ny, subtil og elegant måte.
Heavy Metal
Andreplassen gjekk til Magnus Wendelbo Risinggård frå Telemark for lysestaken «Heavy Metal of Norway», laga i tre og smijern. På tredjeplassen kom Ine Bryhn frå Spikkestad, som har laga ei lampe med oppheng for heklelapp.
Eit tjuetal av konkurranseprodukta skal 4.— 26. februar visast fram på Hadeland Glassverk, der også Statoil er med på lasset. Statoil inkluderer no dei tre vinnarprodukta i «Morgendagens helter»-programmet sitt, eit program som kom i stand etter at Statoil fekk seg ein logo som var vel lik Husflidslagets. Det vart det bråk av.
— Men ut av den krangelen har det utvikla seg eit godt samarbeid, seier kompetanseutviklar Berit Lindquister i Husflidslaget. (©NPK)
