— Vi planlegg ut frå at det blir Folkelarm i 2013, men form, innhald og eigarskap skal gjennomgåast, seier dagleg leiar i FolkOrg, Linda Dyrnes til folkemusikk.no.
Ho seier at det ikkje ligg nokon dramatikk i at Folkelarm skal evaluerast, og legg til Folkelarm har som mål å vera meir enn ei hyggjeleg og bra konsert- og seminarhelg.
— Folkelarm blei første gongen arrangert i 2005, og mykje har skjedd sidan den gongen — difor trur vi at det no er lurt å heva blikket litt og sjå på korleis Folkelarm best kan tena formålet sitt. Gjennom evalueringa håpar vi å få spissa profilen og korrigert kursen for dette arbeidet, seier Dyrnes.
Jan Lothe Eriksen skal leia evalueringsarbeidet. Han har mellom anna bakgrunn frå Musikernes Fellesorganisasjon, Rikskonsertane og som dagleg leiar i Norsk Folkemusikk og dansarlag og som dagleg leiar for Riksscenen.
Han får med seg ei gruppe på tre andre personar. Dei tre er: Torill Faleide, kommunikasjonssjef for Førdesfestivalen, Øyvind Skjerven Larsen, prosjektleiar for Music Export Norway og musikaren Anne Hytta. (©NPK)
