SVs stortingsgruppe ønskjer veto mot vikarbyrådirektivet. No kan det sjå ut til at dei også får følgje av Senterpartiet, som valde å vente med å ta stilling til veto-spørsmålet før saka var avklart i LO-sekretariatet.
- Dette vedtaket vil vere veldig viktig for Senterpartiet når vi skal ta stilling til spørsmålet om veto, seier Geir Pollestad, som er partiets talsmann for arbeidslivsspørsmål.
Les også: LO krev veto mot vikarbyrådirektivet
Han understrekar at sekretariatsvedtaket aukar sjansane for at partiet vil gå inn for veto.
- For min eigen del er dette ein tungtvegande argumentasjon, seier Pollestad.
Senterpartiets stortingsgruppe skal drøfte saka onsdag denne veka. Om dei også går inn for veto, blir Arbeidarpartiet åleine blant regjeringspartia med sin støtte til direktivet.
Arbeidarpartiets arbeidslivspolitiske talskvinne, Anette Trettebergstuen, sa mandag at LOs vedtak ikkje får konsekvensar for partiet.
- Dette endrar ikkje på dei grundige faglege og juridiske vurderingane som tidlegare er gjort av direktivet, så vi kjem framleis til å stå på vårt, seier Trettebergstuen.
Utsegnene er i tråd med signala frå arbeidsminister Hanne Bjurstrøm. Søndag sa ho til NTB at fagrørsla ikkje har nokon grunn til å uroe seg for direktivet, og at Arbeidarpartiet uansett ikkje kom til å gi etter for press i denne saka.
EU og EFTA må tolke
EUs vikarbyrådirektiv har som mål å opne opp for auka bruk av vikarbyrå. Samstundes slår direktivet fast at vikarar skal ha same arbeids- og lønnsforhold som fast tilsette. Kritikarane fryktar at auka bruk av vikarbyrå vil føre til hardare press på arbeidstakarane og gjere fagrørslas kamp mot sosial dumping vanskelegare.
I tillegg seier dei at regjeringa ikkje kan garantere for korleis direktivet blir praktisert når det først er vedteke, ettersom det er EU- og EFTA-domstolen som avgjer korleis direktivet skal tolkast. Støttespelarane for direktivet framhevar at det inneheld eit likebehandlingsprinsipp som gir vikarane same rettar som dei fast tilsette, Dei hevdar at fagrørsla difor ikkje treng frykte vikarane.
