EUs ambassadør i Noreg, János Herman, fortel at EU delegasjonen kjem til å studere Europautredningas rapport nøye.
- Vi kjem sjølvsagt til å følgje debatten med stor interesse. Vi har vår eigen pågåande refleksjon om EØS-avtalen og vil ta denne norske rapporten og den påfølgjande stortingsmeldinga til etterretning, seier Herman.
Les også: Fredrik Sejersted vil ikkje tilrå den norske EU-modellen til andre land
Han legg til at han ikkje ser nokon motsetnad mellom desse to prosessane. Herman understrekar at EUs arbeid ikkje er retta mot Noreg.
- Vi vil ikkje rive ned det vi har utvikla i løpet av dei siste 20 åra eller bytte det ut med noko som er teke ut av lufta. Vi legg sjølvsagt merke til den raske utviklinga i samarbeidet vårt og til endringane innanfor den overordna samanhengen, seier Herman.
Han legg til at ein så må sjå på om det er noko som bør gjerast for å gjere dagens rammeverk for samarbeid betre.
-Grundig studie
EU-ambassadøren kallar Europautredningas rapport «ein grundig studie av høg kvalitet». Han meiner den gir detaljert informasjon og dokumentasjon av effekten av den norske deltakinga i den indre marknaden.
Les også: Europautredningen: - Massiv overføring av lovgivende makt til EU
- Som vi ser, er hovudresultatet ein svært nær og stabil relasjon som tener interessene på begge sider. Ved å få fram ny dokumentasjon, vil rapporten styrke kunnskapsbasen for den pågåande EU/EØS-debatten i Noreg og andre stader. Dette er noko vi ønskjer velkomen, seier Herman.
Legg vekt på tid
Herman legg til at han ønskjer at det han kallar «den gode funksjonsmåten ved dagens avtale» må vidareførast. Han minnar om at Noreg, for å kunne vere ein del av EUs indre marknad, må tilpasse seg EU-regelverket i løpet av dei tidsfristane EU sett.
Les også: Under 50 prosent stør EØS
- I den samanhengen er det viktig at vi er merksame på å tryggje den felles indre marknaden, inkludert implementeringa av ny lovgiving i avtalen til rett tid, seier ambassadøren.
