Norges Bygdeungdomslag (NBU) stod ved årsskiftet 2011/12 med 5852 medlemmar.
900 nye på to år
På same tid i fjor hadde NBU 5301. Det er ein medlemsauke på over ti prosent, og for to år sidan stod medlemstalet på 4999. Med det har NBU fått nesten 900 nye medlemmar på to år.
- Det er ei positiv og tilfredsstillande utvikling. Ein auke på 500 nye medlemmar på eitt år er eit godt utgangspunkt for vidare vekst i 2012, seier Årstein Skjæveland, generalsekretær i NBU til nationen.no.
2011 har vore året der talet på medlemmar i ungdomsorganisasjonar og politiske parti har skote i været. Spesielt etter 22.juli har det vore ein kraftig auke. Både Senterpartiet og Senterungdommen fekk mange nye medlemmar i fjor, men spesielt Arbeidarpartiet og ungdomspartiet AUF har fått ein massiv auke.
Vervekampanjar
Skjæveland seier Bygdeungdomslaget har hatt ein medviten målsetjing om å verve fleire medlemmar i 2011.
- Me har sett oss mål for kor mange nye medlemmar me har ønska å oppnå og sett i gang tiltak for å få det til. Me har mellom anna hatt ulike aktivitetar, som til dømes vervekampanjar, som har blitt arrangert av lokallaga, seier han.
- Me har lagt stor vekt på medlemsverving. Det er ei viktig oppgåve, og nye medlemmar har mykje å sei for NBU, seier Skjæveland.
Aktivitet på Facebook
I 2011 har Bygdeungdomslaget mellom anna vore med på å kåre Årets unge bonde. NBU har ikkje opplevd at kåringa har ført til auka pågang.
- Men interessa for det me driv med og det me står for aukar gjennom hendingar som Årets unge bonde. Me har ikkje statistikk på det, men når me er i vinden med slike kampanjar har me til dømes opplevd mykje meir aktivitet på Facebook-sidene våre, seier Skjæveland.
