På Temakonferansen 2012 i regi av Norsk Landbrukssamvirke på Lillestrøm onsdag sa landbruksminister Lars Peder Brekk (Sp) at det er viktig å vidareføre dagens landbrukspolitiske modell, der bondesamvirka er marknadsregulator.
- Dagens landbrukspolitiske modell, der samvirkene er marknadsregulator med mottaksplikt og forsyningsplikt, skal vidareførast. Utan samvirke vil vi ikkje nå måla vi har sett oss i landbrukspolitikken, sa Brekk og viste til at samvirkene tek imot produksjonen til bønder i heile landet til avtalte prisar.
Brekk understreka at samvirket har ei svært viktig rolle med tanke på å gjennomføre måla i landbrukspolitikken, og han meiner også systemet er det mest effektive ein kan sjå føre seg.
- I dag tek bøndene sjølv kostnaden både ved å regulere marknaden, og kostnaden når det oppstår overproduksjon. Det gjer at næringa sjølv tar grep for å sikre balansen, sa Brekk til tilhøyrarane.
Brekk sa også at han sakna at samvirkeaktørane kom meir på banen for å forsvare interessene til eigarane.
- Av og til saknar vi støtte, og det gjorde vi då saka om ostetoll blei diskutert før jordbruksoppgjeret i fjor, sa Brekk.
Samtidig sa han at det er viktig at bøndene sluttar opp om samvirke, og at samvirke gjer ein viktig jobb for at det skal vere rom for matproduksjon i heile landet.
