Daily Mirror gir fem av fem moglege stjerner. Ifølgje kritikaren har Øvredal & co. « levert ein av årets mest oppsiktsvekkjande briljante filmar» med sin 103-minutt lange «juksumentar».
«Du kan nesten kjenne dei dundrande fotstega til trolla, og det er mogleg å gløyme det latterlege premisset takka vere haugevis med ironisk humor», skriv David Edwards.
Konkurrenten The Sun er nesten like begeistra. Kritikar Grant Rollings, som trekkjer parallellar til 90-talshiten «The Blair Witch project», gir fire av fem stjerner.
«Resultatet er ein film som både er morosam og skremmande. Kryss bruer for å sjå Trolljegeren», oppmodar han.
Dei tradisjonelle fullformatavisene er noko meir tilbakehaldne. The Times gir tre stjerner; det same gjer The Guardian.
«Scenene som involverer trolla, er spektakulære, men ikkje fælslege: dei er for absurde til det», meiner kritikar Peter Bradshaw i sistnemnde avis.
LES OGSÅ: Trolljegeren på amerikanske kinoer
«Trolljegeren» vart lansert heime i fjor, og kretsar rundt Otto Jespersen i hovudrolla som Hans.
Christopher Columbus, kjent frå «Hjemme Alene» — og «Harry Potter»-seriane, har sikra seg rettane til å lage ein amerikansk nyinnspeling. (©NPK)
