Etter valet i 2007 fekk Arbeidarpartiet fylkesordføraren og ti ordførarar, Senterpartiet tre, Kristeleg Folkeparti to og Framstegspartiet tre. Høgre fekk ingen, men mykje tyder på at partiet no vil kome til makta i fleire kommunar. Det er også jamt mellom blokkane i kampen om fylkesordføraren.

— Det ser bra ut på målingane. I Eidsberg ligg me godt an til å verte det største partiet, og i Moss, der eg er ordførarkandidat sjølv, er det også blått fleirtal. I Fredrikstad har Høgre teke over for Frp som det største partiet på borgarleg side, og i arbeidarpartibastionane Halden og Sarpsborg ser det ut til å verte tett løp, seier Tage Pettersen, leiar i Østfold Høgre.

Han trur partiet har tent på å snakke mykje om skule i valkampen.

— Me har nesten utelukkande snakka om skule. Østfold har saman med Finnmark kome dårlegast ut på skulestatistikken i landet, og det er me ikkje nøgde med. Høgre i Østfold har større ambisjonar enn det, seier han.  

Bjørn Steinar Meyer, redaktør i Smaalenenes Avis, som dekkjer kommunane i indre Østfold, trur valet i Eidsberg vert spesielt spennande.

— Ordførar Knut Jørgen Herland (Sp) har hatt makta i 16 år, men den siste meiningsmålinga syner at Senterpartiet går mykje attende og Høgre fram. Mykje tyder på at Erik Unaas vert ny ordførar, seier han.

Unaas sjølv trur Høgre står for noko nytt i Eidsberg.

— Me har fleire unge kandidatar og stiller med ein ny generasjon politikarar som er veldig motiverte, seier han.

Meiningsmålinga syner at Høgre går fram 17,1 prosentpoeng til 29,8 prosent. Alle dei andre partia går attende.

— Tidlegare var Høgre eit parti for dei som bur og jobbar i sentrum. På listene til valet er det no fleire som bur på gard og er opptekne av landbruk, inkludert meg sjølv, og det trur eg kan vere ei forklaring på at me har gått så mykje fram i ein landbrukskommune som Eidsberg, seier Unaas.

Før 2007 hadde Senterpartiet hatt ordføraren i Trøgstad i 85 år. Tor Melvold vart den fyrste arbeidarpartiordføraren i kommunen, etter eit valteknisk samarbeid med Høgre, KrF og Venstre.

— Eg tykkjer me har gjort det godt i førre periode. Det er eit godt samarbeidsklima i kommunen og stor takhøgd for politisk debatt, seier han.

Ordføraren har sakna tilbakemeldingar frå innbyggjarane etter 85 år med senterpartistyre.

— Eg hadde trudd me skulle få fleire tilbakemeldingar, og eg venta meg meir kritikk, men det har altså ikkje kome. I hovudsak trur eg det kjem av at innbyggjarane trivast og er nøgde, seier Melvold.

Det har ikkje vore meiningsmålingar i kommunen, så det er stor uvisse kring valresultatet.

— Eg trur det vert jamt. Det er slettes ikkje sikkert me har alt på plass valnatta. Me kan få eit valresultat som gjer at me må forhandle og snakke med andre, seier han.

Ved førre val gjekk Senterpartiet i Trøgstad attende med 15,8 prosentpoeng til 26,8 prosent, men partiet har ambisjonar om å kome i posisjon att etter valet.

— Me håpar jo på det. Eg er i alle fall klar. Det gjeld å stå på til «the bitter end». Me har fått veldig god respons frå veljarane, så me er optimistar, seier Ole André Myhrvold, ordførarkandidat for Sp i Trøgstad.

Han trur partiet kan ha tent på å vere fire år i opposisjon.

— Eg trur me kan ha hatt godt av å ikkje ha hatt ordføraren. Det har vore ein god erfaring, sjølv om det ikkje har vore like lett heile tida. No ønskjer me å setje i gang med mange nye prosjekt, viss hame kjem til makta. Bygging av ny ungdomsskule er viktig. Det vart vedteke i førre periode, men har ikkje vorte gjennomført enno. Heldigvis er me flinke til å dra lasset saman i Trøgstad, på tvers av partigrenser, og eg håpar det held fram, seier Myhrvold.

Tor Melvold seier det er utfordrande å vere ordførar og drive valkamp.

— Ein ser jo realitetane mykje lettare når du har oversikt over rammevilkåra. Eg kan til dømes ikkje love at ting vert gjennomført viss ein ikkje har midlar til det, seier han.