Noregs Bondelag er nøgde med tydelege signal frå Stortinget om å stramme inn forvaltninga av rovdyrpolitikken, sjølv om dei hadde von om ein endå strammare politikk då alle partia på Stortinget i går vart samde om eit forlik.
- Rovviltforliket i Stortinget er særs etterlengta og viktig for å dempe konfliktnivået i distrikta, seier leiaren i Bondelaget, Nils T. Bjørke.
Likevel skulle han helst sett at talet på bjørn hadde vorte endå meir redusert, og at forvaltninga av grenseulven kunne skjedd utan å måtte forhandle med Sverige. Stortingspartia har bestemt at ein slik avtale skal på plass seinast i 2013.
- Me hadde vona på ein endå strammare politikk, seier Bjørke.
Krev at ny forvaltning kjem raskt i gang
Bondelagsleiaren seier Regjeringa må setje i verk tiltak og instruere apparatet for rovviltforvaltninga med ein gong.
- Beitesesongen har alt byrja. Det hastar med å setje den nye rovviltpolitikken om til handling slik at tap av beitedyr og dyrs lidingar blir redusert kraftig, seier Bjørke.
I forliket presiserer Stortinget bestandsmål for dei ulike rovdyrartane. Bestandsmåla er ikkje å sjå på som minimumstal, men eksakte tal. Bjørke meiner presiseringa Stortinget har gjort i forliket av kor mange rovdyr det skal vera i Noreg er særs viktig.
- Dette er eit særs tydeleg signal til Regjeringa om å stramme opp forvaltninga, seier Bjørke.
Meir regional forvaltning
Stortingspartia har gått inn for at dei åtte regionale rovviltnemndene skal få større myndigheit over forvaltninga. Dette meiner Bondelaget er positivt.
- Større påverknad på uttak av rovvilt som drep mange beitedyr har vore etterlyst mellom bønder som lev med rovdyra tett inn på seg, seier Bjørke.
Også Bondelagsleiaren i rovdyrfylket Hedmark er tilfredse med at lokal og regional forvaltning får større myndigheit.
- Dette er signal som kan skapa meir tillit mellom beitenæringa og forvaltnigna, seier Myki.
Han og kallar forliket eit steg i rett retning
- Forliket er ei klar betring når det gjeld jerv, gaupe og bjørn. Det er bra med eit klart tak på talet på bjørn, seier fylkesleiar Einar Myki.
Også han er skuffa over at det ikkje kom vedtak på bestandsmål for ulv i denne runden.
- Me skjønar at forvaltninga av ulv må skje i samarbeid med Sverige, og støttar dette. Me reknar med at endeleg bestandsmål for ulv er på plass innan 2013, seier Myki.
LES OGSÅ: Bjørke: - Foliket ser lovende ut
LES OGSÅ: Jakt på 52 hannbjørner i år
LES OGSÅ: Naturvernere frykter for bjørnene
LES OGSÅ: Landbruksministeren endelig fornøyd
