Fjøsarbeid og kontakt med dyr kan auke trua på eiga meistring og redusera depresjon hos menneske som treng behandling. Det viser ny forsking.
— Det å handtera ei mjølkemaskin eller våga å gå inn til eit så stort dyr som ei ku er krevjande, og kan gje deltakarane ei oppleving av meistring når dei greier det, seier stipendiat Ingeborg Pedersen, som har gjennomført studien i eit doktorgradsarbeid ved Universitetet for miljø- og biovitskap til nettsida for universitetet på Ås.
I studien fekk personar med klinisk depresjon tilbod om å arbeida i fjøset saman med bonden to dagar i veka i ein periode på tolv veker.
Felles for deltakarane var at dei var heilt eller delvis utanfor arbeidslivet.
Ei anna gruppe med same diagnose fekk vanleg behandling med mellom anna samtaleterapi.
LES OGSÅ: Vil ha meir grønn omsorg
Resultatet viser at dei deltakarane som var i fjøset oppnådde større endring med større tru på eiga meistring og mindre depresjon enn dei som fekk ordinær behandling, fortel universitetet på nettsida si. (©NPK)
LES OGSÅ: Lær å åpne tunet for læring
