Staten la onsdag fram eit tilbod med ei totalramme på 1 milliard kroner i årets jordbruksoppgjer.
Tilbodet står i skarp kontrast til bondekravet på 2,6 milliardar kroner, og det er også langt mindre enn dei 1,7 milliardane som Småbrukarlaget og dels Bondelaget har sagt må til for at bøndene ikkje skal sakke ytterlegare akterut samanlikna med andre grupper.
Vidt ulikt syn på tilbodet
Partane har svært ulik oppfatning av tilbodet.
— Tilbodet er svært godt, og under denne regjeringa har det vore ein historisk god inntektsvekst i jordbruket, sa statens forhandlingsleiar Leif Forsell.
— Tilbodet viser at staten ikkje tek situasjonen i jordbruket på alvor. At staten framleis reknar inntektsutviklinga i prosent, er svært skuffande. Og at dei ser etterslepet i samanheng med åra heilt tilbake til 2006, er provoserande, seier leiar Nils T. Bjørke i Bondelaget.
— Tilbodet er ein provokasjon. Regjeringa leverer ikkje varene, og å framstille det som eit historisk inntektsløft er totalt feil, seier leiar Merete Furuberg i Småbrukarlaget.
Strid om kostnadsvekst
Bak det splitta synet på tilbodet ligg ulikt syn på kostnadsutviklinga i jordbruket framover.
Medan bondeorganisasjonane rekna kostnadsveksten og etterslepet åleine til over ein milliard kroner, så har statens nedjustert kostnadsanslaget.
Samtidig slår dei saman alle åra tilbake til 2006 når dei skal rekne ut om det er eit etterslep. Samla sett, med statens utrekningsgrep og føresetnader i botn, vil tilbodet gi bøndene eit auka inntektspotensial på 17.000 kroner per årsverk.
— Ut frå våre utrekningar tilbyr staten reelt sett ein inntektsnedgang, seier Furuberg.
Bjørke vil derimot ikkje konkludere på ståande fot og seier at dei vil rekne på tilbodet først.
Forsell seier på si side at kostnadsveksten som er lagt inn i tilbodet verkar sannsynleg.
— På olje og gjødsel vurderer vi at sjansen for prisnedgang er større enn oppgang, seier han.
Bondeorganisasjonane vurderer nå om dei skal bryte med staten, eller om tilbodet er bra nok til å gå i forhandlingar på.
